சிக்கன் குருமா & பிரவுன் ரைஸ் தோசை - Chicken Kurma & Brown Rice Dosai

எங்க வீட்டில் அம்மா எப்பொழுதும் செய்யும் குருமா இது…இட்லி, தோசைக்கு மிகவும் நன்றாக இருக்கும். எந்த வித மசாலா பொருட்களும் சேர்க்காமல் எளிதில் செய்ய கூடிய குருமா…நீங்களும் செய்து பார்த்து உங்கள் கருத்தினை தெரிவிக்கவும்.

சமைக்க தேவைப்படும் நேரம் : 20 - 25 நிமிடங்கள்

தேவையான பொருட்கள் :

         சிக்கன் – 1/4 கிலோ

·         தேங்காய் – 1 சிறிய துண்டு (விரும்பினால்)

·         உப்பு – தேவையான அளவு

·         மஞ்சள் தூள் – 1/2 தே.கரண்டி

நசுக்கி கொள்ள :

·         இஞ்சி – சிறிய துண்டு

·         பூண்டு – 5 பல்

வதக்கி அரைத்து கொள்ள :

·         வெங்காயம் – 1

·         தக்காளி – 1

·         பச்சைமிளகாய் – 3

·         மிளகு – 1 தே.கரண்டி (சுமார் 15)

கடைசியில் சேர்க்க :

·         கொத்தமல்லி – சிறிதளவு

முதலில் தாளிக்க:

·         எண்ணெய் – 1 மேஜை கரண்டி

·         பட்டை, கிராம்பு, ஏலக்காய் – 1

·         சோம்பு – 1 தே.கரண்டி (அ) சோம்பு தூள்

செய்முறை :

·         வெங்காயம் + தக்காளியினை பெரிய பெரிய துண்டுகளாக் வெட்டி கொள்ளவும். இஞ்சி + பூண்டினை நன்றாக நசுக்கி கொள்ளவும். தேங்காயினை மிக்ஸியில் போட்டு மைய அரைத்து கொள்ளவும்.

·         கடாயில் சிறிது எண்ணெய் ஊற்றி வெங்காயம் + தக்காளி + பச்சைமிளகாய் + மிளகு சேர்த்து 3 – 4 நிமிடங்கள் வதக்கவும். இதனை சிறிது நேரம் ஆறவைத்து மிக்ஸியில் போட்டு அரைத்து கொள்ளவும்.

·         பிரஸர் குக்கரில் எண்ணெய் ஊற்றி தாளிக்க கொடுத்துள்ள பொருட்கள் சேர்த்து தாளித்து இஞ்சி பூண்டினை சேர்த்து வதக்கவும்.

·         அதன் பிறகு, சிக்கனை சேர்த்து 2 நிமிடங்கள் வதக்கவும்.

·         இத்துடன், அரைத்த விழுது + மஞ்சள் தூள் + தேவையான அளவு உப்பு சேர்த்து 1 நிமிடம் வேகவிடவும்.

·         பிறகு, தேங்காய் விழுது + சிறிது தண்ணீர் சேர்த்து கொள்ளவும்.

·         அனைத்து பொருட்களும் ஒன்றாக கலக்கிவிட்டு பிரஸர் குக்கரினை மூடிவிடவும். 2 விசில் வரும் வரை வேகவிடவும்.

·         சுமார் 5 - 6 நிமிடங்களில், குக்கரில் பிரஸர் அடங்கியதும் திறக்கவும்.

·         கடைசியில் கொத்தமல்லி தூவி பறிமாறவும். சுவையான எளிதில் செய்ய கூடிய குருமா ரெடி.

கவனிக்க:

இதில் எந்த வித தூள் வகைகளும் சேர்த்து கொள்ளவில்லை. அவரவர் காரத்திற்கு ஏற்றாற் போல பச்சைமிளகாய் + மிளகினை சேர்த்து கொள்ளவும்.

சிக்கனிற்கு பதிலாக இதனை காய்கறிகள், பட்டாணி, கொண்டகடலை போன்றவைற்றிலும் செய்யலாம். நன்றாக இருக்கும்.

தேங்காய் விழுது சேர்க்காமல் செய்தாலும் நன்றாக இருக்கும்.

பிரவுன் ரைஸ் தோசை

பிரவுன் ரைஸ் இட்லி மாவினையே இதற்கும் பயன்படுத்தலாம். அதனை காண இங்கே க்ளிக் செய்யவும்.

ஊறவைக்க தேவைப்படும் நேரம் : 3 – 4 மணி நேரம்

சமைக்க தேவைப்படும் நேரம் : 10 நிமிடங்கள்

தேவையான பொருட்கள் :

·         பிரவுன் ரைஸ் – 3 கப்

·         இட்லி அரிசி – 1 கப்

·         உளுத்தமப்ருப்பு – 1 கப்

·         வெந்தயம் – 1 தே.கரண்டி

செய்முறை :

·         பிரவுன்ரைஸ் + இட்லி அரிசியினை ஒன்றாக சேர்த்து தண்ணீரில் குறைந்தது 3 – 4 மணிநேரம் ஊறவைக்கவும். அதே போல உளுத்தம்பருப்பு + வெந்தயம் சேர்த்து ஊறவைத்து கொள்ளவும்.

·         ஊறவைத்த உளுத்தம்பருப்பினை மிக்ஸியில் போட்டு மைய அரைத்து கொள்ளவும். அரிசியினையும் அரைத்து கொண்டு, இரண்டு மாவினையும் தேவையான அளவு உப்பு சேர்த்து தோசை மாவு பதத்திற்கு கரைத்து கொள்ளவும்.

·         மாவினை குறைந்தது 5 - 6 மணி நேரம் புளிக்கவிடவும். மாவு புளித்தவுடன்,தோசைகளாக சுடவும்.

·         சுவையான சத்தான தோசை ரெடி